https://www.facebook.com/PGPPublicRelations/posts/583147255721782PRESS RELEASE
July 4, 2020
PAG-ASA SHELTERED PORT DEVELOPMENT PROJECT SA BAYAN NG KALAYAAN
Pag-asa ang hatid ng pasasakatuparan ng Pag-asa Sheltered Port Project- Phase 1 na matatagpuan sa munisipyo ng Kalayaan, lalawigan ng Palawan. Ang naturang proyekto ay pinondohan ng mahigit P400 Milyon mula sa Department of Transportation (DOTr).
"May this sheltered port symbolize the unwavering efforts of the Philippine government and the province of Palawan to uphold its territorial rights over the West Philippine Sea," ito ang bahagi ng mensahe ni Gob. Jose Ch. Alvarez sa naisakatuparang proyekto.
Base sa Master Development Plan (MDP) nito, ang pagsasakatuparan ng Pag-asa Island Sheltered Port Project ay maaaring umabot sa humigit-kumulang sa P1 Bilyon, kaya naman ang implementasyon nito ay hinati sa Phase 1 at Phase 2.
Dahil sa kakayanan ng Pamahalaang Panlalawigan ng Palawan sa pagsasakatuparan ng mga proyektong imprastraktura sa ilalim ng pamunuan ni Gob. Alvarez at Bise-Gob. V. Dennis M. Socrates ay ipinagkatiwala ng DOTr sa Pamahalaang Panlalawigan ang pangangasiwa sa implementasyon ng nasabing proyekto.
Bahagi ng mga hakbang na isinagawa ng Pamahalaang Panlalawigan sa pagsasakatuparan nito ay ang paglikha at pagpapatibay ng mga resolusyon sa pamamagitan ng Sangguniang Panlalawigan. Gayon din ang pagproseso ng mga dokumento para sa procurement/bidding process at kumpletong dokumentasyon at koordinasyon sa pagtatayo nito.
Samantala, bumuo rin ang Pamahalaang Panlalawigan ng project management team na inatasang manatili sa bayan ng Kalayaan upang masiguro na mapapangasiwaan ng maayos ang konstruksyon ng nasabing proyekto.
Lubos naman ang pasasalamat ni Gob. Alvarez sa DOTr dahil malaki ang tulong ng proyektong ito sa mga lokal na mangingisda.
“The provincial government of Palawan extends its utmost appreciation to the Department of Transportation for the funding of the sheltered port project. We commit ourselves to ensuring that the said facility will be utilized properly and shall take shelter for our fisherfolks who sail within the island,” bahagi pa rin ng mensahe ng gobernador na binasa ni Board Member Albert Rama sa kanyang privilege speech sa ika-48 regular na sesyon ng Sangguniang Panlalawigan noong ika-30 ng Hunyo, taong kasalukuyan. Ibinahagi rin ni Board Member Rama ang malaking ambag ng Pamahalaang Panlalawigan sa pagsasakatuparan ng nasabing proyekto.
Malaki ang naging hamon sa pagdadala ng mga materyales ng naturang proyekto dahil na rin sa lokasyon ng bayan ng Kalayaan na tinatayang may layong 274 nautical miles mula sa Sitio Long Point, Barangay Apurawan, Aborlan Palawan. Ang proyekto ay natapos ng mas maaga sa itinakdang bilang ng araw ng pagtatayo nito na pinangunahan ng kontraktor na bihasa sa port projects.
“Challenges… the difficulties of bringing the materials to Kalayaan, but the project was originally 600 days, but the contractor was able to complete the construction 57 days ahead…” ayon kay Engr. Saylito M. Purisima, ang kasalukuyang hepe ng Infrastructure Division ng IHELP Program ng Pamahalaang Panlalawigan.
Pangunahing layunin ng nasabing proyekto na magkaroon ng pasilidad na magbubukas ng oportunidad para sa mga Pilipinong mangingisda, pampasahero at cargo ships na magdudulot ng masigla at maunlad ng ekonomiya sa naturang bayan sa pamamagitan ng fishing and tourism industry.
Samantala, sa hinaharap ay nakatakda naman ang pagtatayo o paglalagay ng cold storage facility na maaring paglagakan ng mga mahuhuling isda na maaaring ibiyahe sa Kamaynilaan na makakatulong sa mas malaking pagkakakitaan ng mga lokal na mangingisda sa Kalayaan.
“Also in the future ay gusto ng gobernador na magkaroon ng cold storage facilities para sa storage ng mga huli ng mga mangingisda and they can bring it to Metro Manila or any other places in the country for them to command a reasonable price, dahil kadalasan ay dinadaing lang ang isda sa kalayaan walang bumibili. So generally, this is geared towards looking at the economic side of the fisherfolks,” dagdag pa ni Engr. Purisima.
Malaki ang gagampanan ng Pag-asa Sheltered Port Project para makatulong sa estratehiya ng pagprotekta at promosyon ng soberanya ng bansa sa usapin ng Kalayaan Islands Group (KIG) at ang mga karapatan sa soberanya sa usapin ng West Philippine Sea.
"We would like to extend our gratitude to our beloved governor for his effort in securing the fund in implementation of the said project," ani Board Member Rama sa kanyang privilege speech sa Sangguniang Panlalawigan.
